مواضيع منوعة

الوطن.. !

الولاء للوطن.. أمر لا يمكن المساومه فيه الحب و الولاء أو الموالاة مختلفين.. الحب عاطفه و الولاء هو الانتماء و التبعيه.. في فرق بين اللي يقول أحب الكويت و اللي يقول ولائي لهالديره.. اللي يحب ممكن حبه يكون بنسبه او درجه معينه ممكن تكون قابله للمساومه أما ولائي للكويت يعني عزة الكويت عز لي، اللي يضرها يضرني و اللي يجرحها يجرحني.. همسه في اذن كل من يفكر بموالاة دول أخرى و يتبعها ترا الكويت ماهي خاليه بدونك.. و في من يحبها و مستعد يفديها بدمه.. !

فاصل فكاهي :)

قبل جم يوم و في طائرة خاصه تنقل وزير الخارجيه الشيخ محمد الصباح و الوفد المرافق له من جنوب أفريقيا للأرجنتين و بعد مرور ساعتين من زمن الاقلاع طلع الطيار من الكبينه و راح للركاب و قالهم: خزان البنزين اللي بالجهه اليمنى تجمد و وصلت حرارته ما يقارب الـ 70 تحت الصفر و اللي بالجهه اليسرى يطيرنا 3 ساعات لكن الأرجنتين باقي عليها سبع ساعات شنسوي؟ نرجع جنوب افريقيا ولا ننزل اضطراري بأول مطار جدامنا؟ لكم ساعه تشاوروا و ردوا لي خبر.. طبعا اللي كان نايم قعد مخترع... قعدوا يتشاورون و بعد ساعه رجع الطيار يحك راسه و يقول لهم ان المؤشر كان فيه خلل و البنزين مافيه شي.. !و وصل وفدنا للأرجنتين بالسلامه و لله الحمد :)

وكالة يقولون!
وردنا الخبر الآتي عبر وكالة يقولون بالديوانيات... الشيخ العود أمر بإسقاط ديون العراق!!
ان كان هالخبر صحيح ماقدر أعلق!

مسباح

من سنه و أنا أعيش في عالم الـ Blogger كمتابع من خلف الشاشه، متابع بصمت لكل ما يدور في هذا العالم..

و من فتره بسيطه قررت المشاركه في " عالمكم " لتكون لي بصمه كما كانت لكم..

من هو مسباح؟

شاب كويتي يحاول ان يثبت وجهة نظره من خلال ابداء رأيه في كل ما يدور حوله

انزين ليش اخترت بعد سنة متابعه اني أشارككم..؟

اممم.. مادري ليش بس بقلبي كلام و خفت على عمري هاليومين فقلت بدال لا أجابل المنظره و أكلم روحي و لا أتحلطم و أنا بالسياره رايح الدوام أكلمكم و أطلع اللي بقلبي عندكم..

انزين ليش اخترت هالاسم؟

الله يسلمكم اهو مختارينه من قبل بس انا تعبت و أنا أفكر بإسم حق "مدونتي"، حاشني أرق و نزلت الدوانيه تالي الليل.. سحبتلي طاوله و حطيت عليها اللابتوب.. يوم قمت بعدل اللابتوب ولا أشوف هالمسباح اللي بالصوره، و قلت امممم.. مسباح، خوش اسم و توكلت على الله و اخترته..

انزين شسالفة هالمسباح؟

هذا الله يسلمكم أغلى مسباح عندي، مو من ناحية السعر.. لا لا.. قيمته عندي تسوى اغلى المسابيح..

هذا المسباح لو تلاحظون مصنوع من طعام التمر و خيوطه ماهي من النوع الفاخر كلش.. ! هالمسباح سواه ابو صاحبي أيام الغزو.. خذوه العراقيين أسير و سواه بفترة أسره و لما زاره واحد من الأهل عطاه اياه و وصاه يعطيه الوالد.. الوالد خشه عنده مادري جم سنه و بعدين طلعه و حطه بالدوانيه..

و قلت دام اني يوم شفته طرى ببالي اسم المدونه بخليكم تشوفونه بالـ

header..

و سلامتكم و تعيشون...

جني قرقت وايد؟

عادي تحملوا